Samarqandda Rus pravoslav cherkovi rahbari patriarx Kirillga o‘zi tug‘ilgan yilda tayyorlangan vino sovg‘a qilindi

Samarqand ma’muriyati vakillari O‘zbekistonda tashrif bilan bo‘lib turgan Moskva va Butun Rus patriarxi Kirillga pravoslav cherkovida diniy ibodat chog‘ida foydalanib kelingan mahalliy sharobni taqdim etdi. Bu haqda patriarxning matbuot kotibi Aleksandr Volkov ma’lum qildi, deya xabar beradi “RIA Novosti”.

“Qabul davomida unga Samarqand hokimligi tomonidan ‘O‘zbekiston’ markasiga mansub kagor sovg‘a qilindi. Sharob sovet davrida ham, hozir ham foydalanib kelingan, Cherkovga juda yaxshi ma’lum kagorlardan biri. Patriarxga o‘zi tavallud topgan 1946-yilda tayyorlangan vino taqdim etildi”, — dedi Aleksandr Volkov.

Matbuot kotibiga ko‘ra, patriarx Kirill bu sharobni albatta ochishi va o‘zi uchun muhim bo‘lgan diniy marosimlardan birida foydalanishini bildirgan.