Boyqo‘ng‘ir kosmodromidan 72 ta kichik sun’iy yo‘ldoshi bo‘lgan “Soyuz” raketasi uchirildi

14-iyul, juma kuni Boyqo‘ng‘ir kosmodromidan “Kanopus-V-IK” qurilmasi va 72 ta kichik sun’iy yo‘ldoshi bo‘lgan “Soyuz-2.1a” tashuvchi raketasi uchirildi. Bu bir paytning o‘zida parvoz qilgan sun’iy yo‘ldoshlar soni bo‘yicha Rossiyadagi rekord ko‘rsatkich hisoblanadi, deya xabar beradi Meduza.

“Kanopus-V-IK” qurilmasi ob-havo va texnogen falokatlar, shuningdek, tabiatdagi favqulodda vaziyatlar monitoringi, xaritalarni yangilash uchun foydalaniladi.

72 ta kichik sun’iy yo‘ldoshdan iborat guruh Rossiya, Germaniya, Yaponiya, Norvegiya, Kanada va AQSh kompaniyalari qurilmalaridan iborat.

Ma’lumot uchun, sun’iy yo‘ldoshlarni bir paytning o‘zida orbitaga olib chiqish bo‘yicha dunyo rekordi 2017-yil fevralida 104 ta qurilmani uchirgan Hindistonga tegishli.