Yaponiyaning Oarai yadro markazida 6-iyun kuni kukunsimon plutoniy otilib chiqqach, besh nafar xodim zaharli xonada uch soatga yaqin qolib ketgan va katta dozada nurlangan, deb yozadi “TASS” obyekt ma’muriyatiga tayanib.
Zaharlangan xona yopib qo‘yilgan, chunki markaz rahbariyati plutoniy yanada tarqalib ketishiga yo‘l qo‘ymaslik uchun choralar ko‘rgan. Hodisa xodimlar tekshirish maqsadida 1991-yildan buyon muhrlab yopib qo‘yilgan po‘lat konteynerni ochgan vaqtda yuz bergan.
U yerdagi ichida radioaktiv moddalar bo‘lgan qo‘sh plastik xaltalar lahzalar ichida shishib, yorilgan, kukunsimon plutoniy-239 sochilib ketgan va eng yaqin turgan ishchining kombinezoniga kirgan. U yutgan plutoniy shifokorlar hisob-kitoblariga ko‘ra, kelgusi bir yil davomida 1,2 ziverit hajmida umumiy ichki nurlanishni beradi. Yaponiyadagi atom obyektlarida ishchilar uchun yo‘l qo‘yiladigan nurlanish me’yori besh yil davomida 0,1 ziveritga teng.
Qolgan to‘rt xodim ham radiatsiyaning jiddiy dozalari bilan zaharlandi. Ularning barchasi ixtisoslashtirilgan markazga keltirilib, puxta tekshiruvdan o‘tmoqda. Hozircha ularning salomatligida keskin yomonlashish holati kuzatilmayapti.
Izoh (0)