Япониянинг Оараи ядро марказида 6 июнь куни кукунсимон плутоний отилиб чиққач, беш нафар ходим заҳарли хонада уч соатга яқин қолиб кетган ва катта дозада нурланган, деб ёзади «ТАСС» объект маъмуриятига таяниб.
Заҳарланган хона ёпиб қўйилган, чунки марказ раҳбарияти плутоний янада тарқалиб кетишига йўл қўймаслик учун чоралар кўрган. Ҳодиса ходимлар текшириш мақсадида 1991 йилдан буён муҳрлаб ёпиб қўйилган пўлат контейнерни очган вақтда юз берган.
У ердаги ичида радиоактив моддалар бўлган қўш пластик халталар лаҳзалар ичида шишиб, ёрилган, кукунсимон плутоний-239 сочилиб кетган ва энг яқин турган ишчининг комбинезонига кирган. У ютган плутоний шифокорлар ҳисоб-китобларига кўра, келгуси бир йил давомида 1,2 зиверит ҳажмида умумий ички нурланишни беради. Япониядаги атом объектларида ишчилар учун йўл қўйиладиган нурланиш меъёри беш йил давомида 0,1 зиверитга тенг.
Қолган тўрт ходим ҳам радиациянинг жиддий дозалари билан заҳарланди. Уларнинг барчаси ихтисослаштирилган марказга келтирилиб, пухта текширувдан ўтмоқда. Ҳозирча уларнинг саломатлигида кескин ёмонлашиш ҳолати кузатилмаяпти.
Изоҳ (0)