2-iyun kuni Hodinkee ixtisoslashgan portali Monakodagi kimoshdi savdosi lotlari ro‘yxatiga go‘yoki Vladimir Putinga tegishli bo‘lgan qo‘l soatini kiritishganiga e’tibor qaratdi, deb yozadi TJournal.
Sayt xodimlari savdoga qo‘yilgan soat Shveysariyaning Patek Pilippe firmasining “eng murakkab ishlangan” 5208P soati degan xulosaga keldi. Abadiy taqvim, xronograf, Oy fazalari ko‘rsatkichi va tilla siferblatli platina soat — eng qimmatbaholaridan biri deb ham hisoblanadi — uning narxi qariyb bir million dollarga teng.
Asl mol ekanligini tasdiqlash uchun qo‘l soati bilan birga suratga tushirilgan hujjatda uni Watches of Switzerland rasmiy riteylerining Londondagi bo‘linmasida mister Vladimir Vladimirovic Putin sotib olgani ko‘rsatilgan. Hodinkee istalgan kishi Rossiya prezidenti nomi bilan imzo qo‘ya olishini, ammo riteylerlar xaridorning haqiqiy ism-sharifini tekshirishi kerakligini yozdi.
Keyinroq Hodinkee’ning maqolasini Bloomberg chop etdi. Monakodagi auksion loti haqida Fransiya nashrlaridan biri ham yozdi va soat haqiqatan ham Putinga tegishli bo‘lishi mumkinligini ta’kidladi. Shundan so‘ng Rossiyaning ba’zi OAVlari unga tayanib, prezident qimmatbaho soatini sotuvga qo‘ygani haqida xabar berdi.
7-iyun kuni esa Rossiya prezidentining matbuot kotibi Dmitriy Peskov soat Putinga tegishli ekanligi haqidagi ma’lumotni rad etib, uni soxta xabar deb atadi.
Izoh (0)