2 июнь куни Hodinkee ихтисослашган портали Монакодаги кимошди савдоси лотлари рўйхатига гўёки Владимир Путинга тегишли бўлган қўл соатини киритишганига эътибор қаратди, деб ёзади TJournal.
Сайт ходимлари савдога қўйилган соат Швейцариянинг Patek Pilippe фирмасининг «энг мураккаб ишланган» 5208P соати деган хулосага келди. Абадий тақвим, хронограф, Ой фазалари кўрсаткичи ва тилла циферблатли платина соат — энг қимматбаҳоларидан бири деб ҳам ҳисобланади — унинг нархи қарийб бир миллион долларга тенг.
Асл мол эканлигини тасдиқлаш учун қўл соати билан бирга суратга туширилган ҳужжатда уни Watches of Switzerland расмий ритейлерининг Лондондаги бўлинмасида мистер Vladimir Vladimirovic Putin сотиб олгани кўрсатилган. Hodinkee исталган киши Россия президенти номи билан имзо қўя олишини, аммо ритейлерлар харидорнинг ҳақиқий исм-шарифини текшириши кераклигини ёзди.
Кейинроқ Hodinkee’нинг мақоласини Bloomberg чоп этди. Монакодаги аукцион лоти ҳақида Франция нашрларидан бири ҳам ёзди ва соат ҳақиқатан ҳам Путинга тегишли бўлиши мумкинлигини таъкидлади. Шундан сўнг Россиянинг баъзи ОАВлари унга таяниб, президент қимматбаҳо соатини сотувга қўйгани ҳақида хабар берди.
7 июнь куни эса Россия президентининг матбуот котиби Дмитрий Песков соат Путинга тегишли эканлиги ҳақидаги маълумотни рад этиб, уни сохта хабар деб атади.
Изоҳ (0)