AQShning saylangan prezidenti Donald Tramp inauguratsiyadan keyin Twitter’dan faollik bilan foydalanishda davom etadi. U, xususan, avvalgidek, ushbu platforma orqali siyosiy bayonotlar beraveradi. Bu haqda o‘tish jamoasi vakili, Oq uy matbuot kotibi lavozimiga da’vogar Shon Spayser ma’lum qildi, deb yozadi “TASS”.
Tegishli savolga javob berar ekan, Spayser Tramp Twitter’dan “albatta foydalanishi”ni ta’kidladi. “Mening fikrimcha, yetakchi OAVlarni Trampning ijtimoiy tarmoqlardagi obunachilari 45 milliondan ortiq ekanligi, ular bilan Tramp bevosita muloqotga kirisha olishi qo‘rqitadi, — dedi saylangan prezidentning yordamchisi. — U o‘z fikrlarini odamlarga OAVlar orqali yetkazishi shart emas”.
“U Twitter’dan foydalangan vaqtida natijaga erishadi”, — deya qo‘shimcha qildi Spayser. Uning so‘zlariga ko‘ra, saylangan prezident jamoatchilik bilan muloqot uchun “mumkin bo‘lgan har qanday platforma”ni qo‘llash niyatida.
Shu bilan birga, Tramning vakili navbatdagi ma’muriyat Oq uy matbuot uchun o‘tkazadigan doimiy brifinglar an’anasini davom ettirishini ma’lum qildi.
Izoh (0)