Agar Donald Tramp Obama ma’muriyati tomonidan Rossiyaga qarshi kiritilgan sanksiyalarni olib tashlashga qaror qilsa, u AQSh kongressi tomonidan qarshilikka uchraydi. Bu haqda Demokratik partiyadan vakillar palatasi a’zosi Adam Shiff aytib o‘tdi, deb yozadi “RIA Novosti”.
“Ochig‘ini aytganda, biz, Kongressdagilar qabul qilingan choralar (Rossiyani) jilovlab turish uchun yetarli, deb o‘ylamaymiz”, — dedi Shiff. Uning so‘zlariga ko‘ra, agar Tramp ularni bekor qilish uchun choralar ko‘rsa, sanksiyalar rejimini kuchaytirishni nafaqat demokratlar, balki respublikachilar ham, shu jumladan, senator Jon Makkeyn ham talab qiladi.
Avvalroq Oq uyning bo‘lajak matbuot kotibi Shon Spayser AQShning Rossiyaga qarshi, go‘yoki uning kiberhujumlarga aloqadorligi yuzasidan kiritilgan yangi sanksiyalari mutanosib javob ekanligi borasidagi shubhalarini ma’lum qilgan edi.
29-dekabr kuni Barak Obama ma’muriyati “saylovlarga aralashgani” va Rossiyada ishlayotgan “amerikalik diplomatlarga bosim o‘tkazgani” uchun Rossiyaning to‘qqizta muassasa, kompaniya va jismoniy shaxslariga qarshi sanksiyalar kiritgan edi. Shuningdek, AQSh Rossiyaning diplomatik xususiy mulki bo‘lgan ikkita turar-joy majmuasini rossiyalik diplomatlar uchun yopib qo‘ydi va 35 nafar rossiyalik diplomatni persona non-grata deb e’lon qildi.
Izoh (0)