Xalqaro futbol federatsiyasi (FIFA) prezidenti Janni Infantino France-Presse agentligiga bergan intervyusida korrupsiyaga aloqador emasligini ma’lum qildi, deb xabar bermoqda “TASS”.
“Men shunchaki ishchiman. Men noqonuniy daromad olmayman. Hech kimni aldamayman va FIFAda kimdir bu ish bilan shug‘ullanishini istamayman”, – dedi Infantino.
5-oktabr kuni Norvegiyaning Josimar portali FIFA Axloq qo‘mitasi tashkilot rahbari Janni Infantinoga nisbatan yangi surishtiruv ishini boshlagani haqida ma’lum qilgandi. Mutasaddi UEFA bosh kotibi bo‘lgan vaqtida UEFAning amaldagi prezidenti Aleksander Cheferin rahbarligidagi Sloveniya futbol ittifoqiga noqonuniy ravishda foydalanilgan kreditni ma’qullaganlikda ayblanmoqda.
Shu yilning iyul oyida Germaniyaning Bild nashri FIFA Axloq qo‘mitasi tashkilot mablag‘larini shaxsiy maqsadlarda ishlatayotganlikda ayblanayotgan FIFA prezidenti Janni Infantinoga nisbatan dastlabki tergov ishini boshlagani haqida ma’lum qilgandi.
Shuningdek, Frankfurter Allgemeine Zeitung gazetasi Infantino shaxsiy maqsadlari uchun FIFA g‘aznasidan kamida 14 ming yevro ishlatganini ma’lum qilgandi. Xususan, FIFA prezidenti tashkilot mablag‘larini trenajyor, matras, smoking, gul va butsalar uchun sarflagan.
Izoh (0)