“FVV xodimlari pul yig‘ish bilan shug‘ullanmaydi”. Andijon FVB soxta xodimlardan ogohlantirdi

Andijon Favqulodda vaziyatlar boshqarmasi kuz-qish mavsumida soxta xodimlarga aldanib qolmaslikka chaqirdi.

Qayd etilishicha, so‘nggi yillarda kuz-qish mavsumida mamlakat bo‘ylab maxsus kiyimlar kiyib olgan shaxslar o‘zlarini go‘yoki davlat yong‘in nazorati organi xodimi sifatida tanishtirib, fuqarolardan yillik majburiy to‘lov deya noqonuniy tarzda pul yig‘ishga urinish holatlari kuzatilmoqda.

“Yuqorida aytilgan shaxslarning Favqulodda vaziyatlar vazirligi faoliyatiga hech qanday aloqasi yo‘qligini maʼlum qilamiz”, deyiladi xabarda.

Xonadoningizga kelib, o‘zini FVV quyi tizimlariga o‘xshash tashkilot nomlari bilan tanishtirgan shaxslardan birinchi navbatda shaxsini tasdiqlovchi hujjatini so‘rab, ularning qanday faoliyat bilan shug‘ullanishiga aniqlik kiritish zarur.

Ular tomonidan taklif etiladigan xizmatlar faqatgina sizning roziligingizga ko‘ra amalga oshiriladi.

Agarda, xizmat ko‘rsatmasdan yoki favqulodda vaziyatlardan muhofaza qilish yuzasidan biror ishni bajarmasdan, majburiy to‘lov talab qilinsa, huquqni muhofaza qiluvchi organlarga murojaat qilish mumkin.

Taʼkidlash joiz, forma kiyib yuruvchi vazirlik, idora va tashkilotlar harbiylari hamda xodimlarining tasdiqlangan kiyimlarini bunday huquqqa ega bo‘lmagan shaxslar tomonidan kiyib yurish uchun javobgarlik belgilangan.