Shimoliy Koreya yetakchisi Kim Chen In mamlakatning yadroviy qurollarini tezkor ravishda kengaytirishi kerakligi borasida topshiriq berdi. Bu haqda Reuters agentligi xabar berdi.
Qayd etilishicha, Kim Chen In AQSH va Janubiy Koreyaning birgalikdagi harbiy mashg‘ulotlarini urush qo‘zg‘atish istagining yaqqol ifodasi deb atagan.
Janubiy Koreya va AQSH yaqin kunlarda birgalikda harbiy mashg‘ulotlarni boshlaydi. Ular Shimolning yadroviy tahdidlariga qarshi javob choralarini ham sinovdan o‘tkazishadi. Pxenyan bunday mashg‘ulotlarni muntazam ravishda tanqid qilib keladi. Seul va Vashington esa mashg‘ulotlar mudofaa uchun ekanligini ta’kidlaydi.
Nashrning aniqlik kiritishicha, 40 ta dala mashg‘ulotining 20 tasi sentyabr oyiga ko‘chirilgan. Mashg‘ulotlarning kechiktirilishi Janubiy Koreya prezidenti Li Jae Myungning Shimoliy Koreya bilan keskinlikni yumshatish istagi bilan izohlangan. Biroq tahlilchilar Pxenyanning bunday tashabbusga ijobiy munosabat bildirishidan shubhalanmoqda.
“Mashg‘ulotlar Shimoliy Koreyaga nisbatan dushmanona va qarama-qarshi munosabatni saqlab qolish niyatining yaqqol ifodasi”, — deya Kimning so‘zlarini keltirgan Shimoliy Koreyaning KCNA nashri.
Shimolliklar rahbarining iddaosicha, xavfsizlik borasidagi vaziyat Shimoliy Koreyani yadroviy qurollarni tezkor ravishda kengaytirishga majbur qilmoqda. Shuningdek, u AQSH va Janubiy Koreya mashg‘ulotlarida yadro elementi bo‘lganini qayd etgan.
AQSH prezidenti Donald Tramp va Janubiy Koreya yetakchisi Li Jae Myung o‘rtasida Shimoliy Koreyaning yadroviy salohiyatini jilovlash borasidagi navbatdagi uchrashuv Vashingtonda bo‘lib o‘tadi.
Janubiy koreyalik tahlilchilarning aytishicha, shimolliklar bu qadam orqali yadro qurolidan voz kechish g‘oyasini butunlay rad etmoqda va kelgusida qurollarni jilovlab bo‘lmas darajaga olib chiqmoqchi.
Amerikalik olimlar federatsiyasi 2024-yili e’lon qilgan hisobotida, Shimoliy Koreyada 90 tagacha yadroviy kallak ishlab chiqish uchun yetarli darajada xomashyo bor. Biroq amalda ularning soni 50 taga yaqin.
Izoh (0)