Londonda Yevroittifoqdan chiqishga qarshi aksiya bo‘lib o‘tdi

Londonda Buyuk Britaniyaning Yevropa ittifoqidan chiqishiga qarshi namoyish bo‘lib o‘tdi, deb yozadi “RBK”. Brexit’ga qarshi minglab kishilar hukumatni qit’a bilan aloqalarni mustahkamlashga chaqirdi.

Namoyish Lissabon kelishuvining 50-moddasi kuchga kiritilishini kechiktirish uchun hukumatga bosimni kuchaytirish maqsadida o‘tkazildi, u Buyuk Britaniyaning Yevroittifoqdan rasman chiqishi boshlanishini bildiradi.

Aktivistlar Gayd-parkdan parlament binosigacha bo‘lgan yo‘ldan o‘tdi. Parlament binosida 5-sentabr, dushanba kuni mamlakatning Yevroittifoqqa a’zoligi haqida ikkinchi referendumni o‘tkazish kerak yoki yo‘qligi masalasida debatlar bo‘lib o‘tadi.

Ikkinchi referendumni o‘tkazish haqidagi petitsiya 4 milliondan ortiq imzo yig‘di, ammo Buyuk Britaniya hukumati petitsiya mualliflari va tarafdorlarining talablarini rad etdi.

Aksiya Londondan tashqari, Edinburg va Birmingemda ham o‘tkazildi.