Britaniyalik ikki alpinist Shveysariya va Italiya chegarasida joylashgan Alp tog‘laridagi mashhur cho‘qqi — Matterxorn (balandligi — dengiz sathidan 4478 metr, italyancha nomi — Monte Chervino) yonbag‘irlarida halok bo‘ldi, deya xabar bermoqda “TASS” Birlashgan Qirollik tashqi ishlar vazirligiga tayanib.
“Biz ikki britaniyalikning Monte Chervinodagi o‘limini tasdiqlashimiz mumkin, biz mahalliy hukumat bilan aloqada bo‘lib turibmiz”, — dedi TIV rasmiy vakili.
Britaniyaliklar cho‘qqiga uning janubiy yonbag‘irlari orqali ko‘tarilayotgan vaqtida 4-avgust, payshanba kuni ob-havo buzilib, qor yog‘ishni boshlagan va ular bedarak yo‘qolgan.
Alpinistlarning jasadlari dengiz sathidan 4 ming metr balandlikdagi daradan Italiya qidiruv-qutqaruv brigadasi tomonidan topilgan. Keskin sovib ketgan havo britaniyaliklarni g‘aflatda qoldirgani taxmin qilinmoqda, chunki ularning egnidagi kiyimlar ob-havoga mos bo‘lmagan.
Izoh (0)