AQShda 1879-yili zarb etilgan 4 dollar nominalidagi noyob tilla tanga Bonhams auksion uyi tomonidan sentabrda Los-Anjelesda sotuvga qo‘yiladi. Bu haqda “TASS” xabar bermoqda.

Tanga o‘sha paytlarda ommalashmadi, chunki u avvalo xalqaro savdoda to‘lov vositasi sifatida ko‘rilgandi. “1880-yillarda oddiy amerikalik xalqaro savdo muammolari haqida o‘ylab o‘tirmagan. Shu bois tanga qiziqish uyg‘otmagan”, — deb ta’kidladi auksion uyi vakili Pol Song. Natijada AQSh kongressi tangani ommaviy nusxada ishlab chiqarish rejasidan voz kechdi. 425 tangadan iborat tajriba turkumi sotib yuborildi, tanga quyilgan qolip esa yo‘q qilindi.

Auksionda tanga 50—60 ming dollarga sotilishi kutilmoqda. Oldinroq ular 1—2 million dolllardan sotilardi, biroq ushbu nusxa yuzasida eskirish izlari sezilgani va uzoq vaqt zeb-ziynat tariqasida foydalanilgani ehtimoli tufayli arzon baholandi.