Британиялик икки альпинист Швейцария ва Италия чегарасида жойлашган Альп тоғларидаги машҳур чўққи — Маттерхорн (баландлиги — денгиз сатҳидан 4478 метр, италянча номи — Монте Червино) ёнбағирларида ҳалок бўлди, дея хабар бермоқда «ТАСС» Бирлашган Қироллик ташқи ишлар вазирлигига таяниб.

«Биз икки британияликнинг Монте Червинодаги ўлимини тасдиқлашимиз мумкин, биз маҳаллий ҳукумат билан алоқада бўлиб турибмиз», — деди ТИВ расмий вакили.

Британияликлар чўққига унинг жанубий ёнбағирлари орқали кўтарилаётган вақтида 4 август, пайшанба куни об-ҳаво бузилиб, қор ёғишни бошлаган ва улар бедарак йўқолган.

Альпинистларнинг жасадлари денгиз сатҳидан 4 минг метр баландликдаги дарадан Италия қидирув-қутқарув бригадаси томонидан топилган. Кескин совиб кетган ҳаво британияликларни ғафлатда қолдиргани тахмин қилинмоқда, чунки уларнинг эгнидаги кийимлар об-ҳавога мос бўлмаган.