Буюк Британиянинг Евроиттифоққа аъзолиги истиқболлари ҳақидаги референдум натижалари маълум бўлгач, Лондон фонд биржасининг асосий FTSE 100 индексига кирувчи Британия компаниялари нархи 45 миллиард фунтга (62 миллиард доллар) тушиб кетди, деб ёзади «ТАСС» AP’га таяниб.
FTSE 100 савдолар бошида 8,7 фоизга пасайган бўлса, уларнинг сўнгига келиб, 3,17 фоизга тушишни намоён қилди, у 199,41 пункт йўқотиб, 6138,69-пунктга келиб қолди. Инвесторлар фонд бозорининг бу тарзда қисқаришини Британия «қора жума»си деб атади. Британиянинг Barclays (22%), Lloyds (18%) ва Royal Bank of Scotland (16%) каби банклари пасайишда айниқса етакчи бўлди.
Лондон биржасининг яна бир индекси — Буюк Британия иқтисодиёти индикатори дея баҳоланадиган FTSE 250 11,4 фоизга пасайиб, ўз тарихидаги энг йирик қулашни намоён этди.
23 июнь, пайшанба куни Буюк Британияда бўлиб ўтган референдумда мамлакатнинг Евроиттифоқдан чиқиши тарафдорлари ғолиб бўлди. Британияликларнинг 51,9 фоизи (17,41 миллион киши) Бирлашган Қиролликнинг Евроиттифоққа аъзолигини тугатишни ёқлаб овоз берган бўлса, 48,1 фоизи (16,14 миллион киши) бунга қарши чиқди.
Изоҳ (0)