Shimoliy Irlandiyaning millatchilik kayfiyatidagi eng yirik partiyasi — “Shinn Feyn” Buyuk Britaniyaning Yevropa Ittifoqi tarkibidan chiqishi Shimoliy Irlandiyaning Irlandiya bilan birlashuvi masalasida referendum o‘tkazilishi uchun asos bo‘la olishini ma’lum qildi. Bu haqda Reuters agentligi xabar berdi.
“Buyuk Britaniyaning Yevroittifoqqa a’zoligi masalasi bo‘yicha o‘tkazilgan referendum natijalari Irlandiya shimolidagi siyosiy manzarani keskin o‘zgartiradi va biz Irlandiya bilan umumiy chegaralar o‘rnatish bo‘yicha referendumni tashkillashtirish bo‘yicha harakatlarimizni boshlaymiz”, — dedi partiya raisi Deklan Kirni.
Siyosatchining fikricha, Shimoliy Irlandiya aholisi Yevropa Ittifoqi tarkibida qolish uchun ovoz bergani holda, referendum aks natija bilan yakuniga yetgani Britaniya hukumatini Shimoliy Irlandiya nomidan harakat qilish huquqidan mahrum etadi.
Radikal kayfiyatdagi Irlandiya respublikachilar armiyasi mavjud bo‘lgan davrda “Shinn Feyn” partiyasi uning siyosiy qanoti sifati hisoblanar edi.
1921-yilda Buyuk Britaniya va Irlandiya o‘rtasida tinchlik shartnomasi imzolangan bo‘lib, unga ko‘ra Irlandiya dominion maqomini olgan, 1949-yilda esa to‘liq mustaqillikka erishgan. Shimoliy Irlandiya esa Buyuk Britaniyaning bir qismi sifatida qirollik tarkibida qolgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)