Brexit bo‘yicha ovoz berish natijalari dunyo moliya bozorlarida sarosima keltirib chiqardi. Fond boshqaruvchilari va bankirlar zararlarga tayyorlanmoqda, investorlarga esa AQSh g‘azna qog‘ozlari va oltinga pul tikishni tavsiya qilmoqda, deb yozadi “RBK”.
Buyuk Britaniyaning Yevroittifoqdan chiqishi tarafdorlari ovozlarning 51,8 foizini to‘plagan Brexit bo‘yicha ovoz berish natijalari iyenadan tashqari barcha jahon bozorlari va valyutalari pasayib ketishiga sabab bo‘ldi.
Britaniya funti 1,33 dollargacha arzonlashib, 1985-yildan buyon eng past ko‘rsatkichni namoyon etdi. Brent neftining bir barreli 6 foizga tushib ketdi.
Yaponiya iyenasi esa savdolar chog‘ida deyarli uch yillik maksimumgacha ko‘tarildi va 1 dollar uchun 100 iyenadan oshdi. Yevro kursi, aksincha, mart oyidan buyon eng past ko‘rsatkichni namoyon qilib, 1,1 dollargacha tushdi.
Barcha Osiyo maydonlarida indekslar sezilarli darajada pasayib ketdi. Yaponiyaning Nikkei 225 birjasi 8 foiz yo‘qotdi, Gonkong fond birjasi Hang Seng 4,2 foizga pasaydi. Investitsiya fondlari boshqaruvchilari vaziyatni sarosimaning boshlanishi deya tavsifladi, uning oqibatlarini esa hech kim hozircha baholay olmaydi.
“Bu juda qo‘rqinchli, men bunga o‘xshash holatni hech qachon ko‘rmaganman. Biz deyarli barcha aktivlardan mablag‘ oqib ketishini kutmoqdamiz. Ko‘plab investorlar ko‘p-ko‘p pul yo‘qotadi”, — dedi ETF Securities tadqiqotlar va investitsiyalar bo‘limi rahbari Jeyms Batterfill.
Mizuho Bank bosh iqtisodchisi Vishnu Varatan fikricha, yagona bexato strategiya — oltin va Amerika g‘azna qog‘ozlarini sotib olish.
Izoh (0)