AQSh prezidentligiga Respublikachilar partiyasidan nomzod Donald Tramp o‘zining raqibi Hillari Klintonni “Dunyo miqyosidagi aldoqchi” deb atadi. Bu haqda Reuters ma’lum qildi.
“Hillari Klinton Qo‘shma Shtatlar prezidenti lavozimiga da’vogarlik qilgan eng korrupsiyalashgan kishi bo‘lsa ajab emas”, — deya ta’kidlagan Tramp Nyu-Yorkda, tarafdorlari orasidagi chiqishi chog‘ida.
Milliarderga ko‘ra, Klinton “shaxsiy boyish va o‘g‘rilik siyosatini mukammallik darajasiga olib chiqdi”. U Davlat kotibi lavozimidagi qarorlarini Klintonlar jamg‘armasi va u bilan bog‘liq xayriya tashkilotlari ta’sirida qabul qilgan. Shuningdek, Tramp raqibini mustabid tuzumlarga pora evaziga yordam berishda ayblab, Davlat departamentini boshqargan ikki yili davomida Klinton 21,6 million dollar ishlab olganini bildirdi.
Davlat kotibi sifatida siyosiy xato qarorlar qabul qilgani, IShID ta’sir doirasi o‘sishini tiyish, Eronga nisbatan sanksiyalar kuchaytirilishiga erishish, Liviyadagi xaosning oldini olishga muvaffaq bo‘lmaganini tanqid qildi. “Qayerga borgan bo‘lsa, uning qarorlari o‘lim, vayronagarchilik va terrorchilikni yoyishdan bo‘lakka yaramadi”, — deya ma’lum qilgan Tramp.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)