Gollandiyaning o‘ta o‘ng kayfiyatdagi “Erkinlik partiyasi” yetakchisi Gert Vilders, Buyuk Britaniyadagi umummilliy ovoz berish yakunlari haqidagi xabarlardan so‘ng, Gollandiyada ham mamlakatning Yevropa Ittifoqiga a’zoligi masalasida referendum o‘tkazishga chaqirdi. Bu haqda Reuters agentligi xabar bermoqda.
“Biz o‘z mamlakatimiz, o‘z moliyamiz, o‘z chegaralarimiz uchun o‘zimiz mas’ul bo‘lishni va mustaqil ravishda immigratsiya siyosatimizni yuritishni istaymiz”, — dedi Vilders.
Partiya yetakchisining so‘zlariga ko‘ra, gollandlar imkon qadar tezroq mamlakatning Yevropa Ittifoqiga a’zoligi masalasida o‘z nuqtai nazarlarini bildirishlari darkor.
Jamoatchilik fikri so‘rovlariga ko‘ra, Gollandiyaning eng taniqli siyosiy arbobi hisoblangan Vilders, kelasi yil mart oyida bo‘ladigan parlament saylovlarida uning partiyasi g‘olib chiqsa va uning o‘zi mamlakat bosh vaziriga alyansa, Yevroittifoqdan chiqish masalasini umumxalq muhokamasiga qo‘yishga va’da berdi. “Bu masalani gollandlarning o‘zi hal qilsin”, — dedi u.
Reuters’ning xabar berishicha, Een Vandaag telekanali tomonidan o‘tkazilgan so‘rov natijalari Gollandiya aholisining 54 foizi Yevroittifoqqa a’zolik masalasida referendum o‘tkazilishi kerak, deb hisoblaydi.
23-iyun, payshanba kuni Buyuk Britaniyada mamlakatning Yevropa Ittifoqiga a’zoligi masalasida referendum bo‘lib o‘tdi. Ovoz berishning 51,9 foiz ishtirokchisi Ittifoq tarkibidan chiqish uchun, 48,1 foizi esa Ittifoqda qolish uchun ovoz berdi. Referendumda saylovchilarning 72 foizdan ortig‘i, umumiy hisobda 33,5 milliondan ortiq kishi qatnashgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)