“Lester” Angliya chempioni bo‘lgani taqdirda, Ranyeri qo‘shimcha besh million funt sterling oladi

Angliyaning “Lester” jamoasi bosh murabbiyi Klaudio Ranyeri, klub ichki chempionat g‘olibi bo‘lgan taqdirda, bonus tariqasida qo‘shimcha besh million funt sterlingga ega bo‘ladi. Bu haqda, The Daily Mail nashriga asoslanib, “Sport Ekspress” xabar bermoqda.

Aytilishicha, mutaxassisning klub bilan imzolagan shartnomasida yuqori natijalar ko‘rsatilganida taqdim etiladigan moliyaviy rag‘bat ko‘zda tutilgan. “Lester” chempionlikni qo‘lga kiritsa, 18-qatordan yuqori har bir o‘rin uchun italiyalik murabbiy 100 ming funt sterlingdan mukofot oladi, bu punkt bo‘yicha uning bonusi 1,7 million funt sterlingni tashkil etadi. Qo‘shimcha ravishda birinchi o‘rin hamda Chempionlar Ligasiga chiqqanlik uchun mukofot puli nazarda tutilgan.

Ma’lumot uchun, “Lester” Angliya Premyer-Ligasining joriy mavsumi yakunlanishiga uch tur qolgan bir paytda ikkinchi pog‘onada ketayotgan “Tottenxem”dan yetti ochko ustunlik bilan birinchi o‘rinni saqlab turibdi. 36-turda “Manchester Yunayted” ustidan mehmonda g‘alaba qozona olsa, “Lester” amalda chempionlikni rasmiylashtiradi.