Myunxenning “Bavariya” futbol klubi bosh murabbiyi Xosep Gvardiola “Atletiko Madrid”ga qarshi Yevropa Chempionlar Ligasi yarim final dastlabki uchrashuvi oldidan o‘z fikrlari bilan o‘rtoqlashdi, deya xabar bermoqda UEFA rasmiy sayti.
“Yarim finalga qadar yetib kelganimizdan mamnunmiz va bu bosqichda barcha jamoalar, xususan, ‘Atletiko’ ham kuchli ekanini bilamiz. Bu jamoani ‘Barselona’ va ‘Real Madrid’ bilan taqqoslash mumkin. Ular Yevropa grandlariga qarshi o‘yinlarda yaxshigina qarshilik ko‘rsata oladi. Simeone ‘Atletiko’ bosh murabbiyi sifatida ko‘p natijalarga erishdi. Bizni a’lo darajadagi o‘yin, to‘laqonli va tomoshabop futbol spektakli kutib turibdi. Finalga chiqish uchun qo‘limizdan kelganini qilamiz”, — dedi Gvardiola.
“‘Atletiko’ — serqirra jamoa. Men ularga qarshi besh yildan beri o‘ynaganim yo‘q. Mutaxassislarning aytishicha va o‘zim ham guvoh bo‘lib turganimdek, bu jamoa juda yaxshi himoyalanadi. Biroq ‘Atletiko’ning ustunliklari shu bilan tugab qolmaydi. Madridliklar o‘z strategiyasi bo‘yicha ustalik bilan harakat qiladi, Koke standart vaziyatlarni zo‘r amalga oshiradi, himoya yaxshi tashkil etilgan, raqib uchun bo‘sh hududlar qoldirmaydi va qarshi hujumlarda qoyilmaqom harakat qiladi”, — dedi “Bavariya” ustozi.
“So‘nggi uch-to‘rt yildan beri ‘Atletiko’ Ispaniyada chempionlik uchun kurashmoqda, Yevropada esa eng yuksak sovrinlar uchun da’vogar, shu sababli ham, uni mag‘lub etish uchun deyarli bexato o‘ynash kerak. Biz bu raqibning o‘yinlarini ko‘p o‘rgandik, endi amalda unga muammolar yarata olishimiz zarur”, — dedi madridliklar bosh murabbiyi.
“Futbolda raqibga moslashish kerak, biz eng ijobiy natijaga erishish imkonini beradigan darajada raqibga moslashishga urinamiz. Uch yil ichida ‘Bavariya’ uch marta Chempionlar Ligasi yarim finaliga chiqdi. Bilaman, Chempionlar Ligasidagi g‘alabasiz mening ‘Bavariya’dagi faoliyatimni tugal muvaffaqiyatli deb bo‘lmaydi, deydigan kishilar bor. Har nima bo‘lganda ham, Germaniyada ishlash tajribasiga ega bo‘lganimdan juda baxtiyorman. Nazarimda, men nisbatan vazminlashdim, murabbiy va inson sifatida o‘sdim”, — deya qo‘shimcha qildi “Bavariya” bosh murabbiyi Xosep Gvardiola.
Avvalroq “Atletiko Madrid” bosh murabbiyi Diyego Simeone uning shogirdlari “Bavariya”ga qarshi YeChL yarim final o‘yini oldidan faqat g‘alaba haqida o‘ylayotganini aytib o‘tgan edi.
Ma’lumot uchun, “Atletiko Madrid” — “Bavariya” uchrashuvi 27-aprel, chorshanba kuni Toshkent vaqti bilan 23:45 da boshlanadi. “Daryo” internet-nashri mazkur uchrashuvdan matnli onlayn uyushtiradi.
Izoh (0)