Ross dengizida joylashgan avtomatlashtirilgan meteostansiyada o‘tgan yil mart oyida Antarktida uchun rekord darajadagi yuqori harorat — +17,8 qayd etildi. Odatda bu hududda mart oyida o‘rtacha harorat -17 daraja bo‘lardi. Bu haqda National Geographic xabar bermoqda.
Antarktidadagi favqulodda issiq haqida Chexiyadagi Masarikov universiteti olimlari ma’lum qildi. Ular yilda bir bor meteostansiya ko‘rsatkichlarini olish uchun Ross oroliga jo‘naydi. Bu galgi safar chog‘ida o‘tgan yil 24-martida deyarli butkul qor va muz bilan qoplangan orolda +17 daraja bo‘lgani aniqlandi. Ushbu hududda eng sovuq oy avgust (o‘rtacha -27,4 daraja), issiq oylar esa dekabr va yanvar (-3 daraja) bo‘lar, mart uchun esa -17 daraja me’yor hisoblanadi.
Chex olimlari olgan ko‘rsatkichlarni xatoga yo‘yish mumkin edi, biroq meteorologlar barcha qurilmalar benuqson ishlaganini ta’kidlamoqda. Alohida olingan bir kunda yuqori harorat tog‘lardan tushuvchi va shu asnoda qizuvchi havo (fyon) natijasi, shuningdek, sayyorada iqlimning umumiy o‘zgarishi, jumladan, Antarktidada global isish ta’siri bo‘lishi mumkinligi aytilmoqda.
Izoh (0)