AZUR air aviakompaniyasi Toshkentga favqulodda qo‘nishga majbur bo‘lgan Boeing 767-300 samolyoti yuzasidan bayonot berdi. Bu haqda “Rambler.Puteshestviya” xabar bermoqda.
26-fevral, juma kuni mahalliy vaqt bilan 5:38 da bortida 327 yo‘lovchi va 9 nafar ekipaj a’zosi bo‘lgan AZUR air’ning Boeing 767-300 layneri Toshkent aeroportiga favqulodda qo‘ndi. Samolyot Moskvadan Tailandning Pxuket kurortiga uchayotgan edi.
“Kema hujjatlariga muvofiq, uchuvchilar mazkur turdagi havo kemalarini qabul qilishga qodir bo‘lgan eng yaqin aeroportga samolyotni qo‘ndirish haqida to‘g‘ri qaror qabul qilgan. Qo‘nish odatdagi tartibda amalga oshirilgan”, — dedi AZUR air’ning jamoatchilik bilan aloqalar bo‘yicha direktori Anastasiya Matyushina “Rambler.Puteshestviya” portaliga bergan intervyusida.
Uning so‘zlariga ko‘ra, hozirda Toshkentda turgan yo‘lovchilar ikkita zaxira samolyoti yetib kelishini kutmoqda. Yo‘lovchilarga ichimliklar va ovqat berilmoqda.
“Bizning ikkita Boeing 757-200 samolyotimiz Toshkentga yo‘l olib, u yerdan yo‘lovchilarni hordiq joyiga yetkazish uchun parvoz qilishga tayyor turibdi. Hozirgi vaqtda biz mazkur samolyotlarning uchib o‘tishi uchun Pxuketgacha bo‘lgan yo‘nalishda joylashgan Hindiston, Pokiston va boshqa mamlakatlarning aviatsiya ma’muriyatlaridan ruxsat berilishini kutmoqdamiz”, — dedi Matyushina.
AZUR air samolyotining Toshkentga favqulodda qo‘nishi yuzasidan Rossiya Tergov qo‘mitasi tekshiruv ishlarini boshlagan. Samolyot majburiy qo‘nishni amalga oshirishiga dvigateldagi moyning past darajasi datchigi ishlab ketgani sabab bo‘lgan. Hozircha AZUR air texnik yordam so‘rab “O‘zbekiston havo yo‘llari”ga murojaat qilmagan.
AZUR air aviakompaniyasi 2014-yilga qadar “Katekavia” deb nomlangan va 2015-yil martigacha UTair’ning shu’basi edi. Mazkur aviatashuvchi parvozlarni ikki xil — Boeing-757 va Boeing-767 samolyotlarida amalga oshiradi. Aviakompaniya parkida 14 samolyot bor, u Tailand, Ispaniya, Isroil, Dominikanaga charter reyslar amalga oshirishga ixtisoslashgan.
Izoh (0)