Ozarbayjonda valyuta mablag‘lari mamlakat tashqarisiga o‘tkazilayotganda uning 20 foizini ushlab qolish to‘g‘risidagi qonunning kuchga kirishi kechiktirildi. Mamlakat prezidenti Ilhom Aliyev qonun loyihasini imzolashdan bosh tortdi va uni parlamentga qaytardi, deb xabar beradi “RBK”.
Ushbu qonunning kuchga kirishiga yo‘l qo‘ymaslik qarori investor va tadbirkorlarning ko‘p sonli murojaatlarini inobatga olgan holda qabul qilindi.
Kapitallar harakatini qisman nazorat qilish va bank depozitlarini majburiy sug‘urta qilishni ham inobatga olgan qonun loyihasi 19-yanvar kuni parlamentning favquloddagi sessiyasida qabul qilingan edi. Xorijda ko‘chmas mulk, qimmatbaho qog‘ozlar sotib olish va to‘g‘ridan-to‘g‘ri investitsiyalar kiritilishi uchun valyuta tranzaksiyalaridan 20 foizlik yig‘im yig‘ish taklif qilingandi. Shuningdek, yil davomida pul o‘tkazmalari 50 ming dollardan oshganida ham shunday summa yig‘ish taklif etilgandi.
Tahlilchilarning fikriga ko‘ra, valyuta nazoratini kuchaytirish xorijlik investorlarga qiyinchiliklar tug‘dirishi mumkin edi.
Izoh (0)