Qodirov uchinchi chechen urushi ehtimolini istisno qildi
Checheniston hukumati uchinchi chechen urushi yuzaga kelishiga yo‘l qo‘ymaydi. Bu haqda respublika rahbari Ramzan Qodirov kuch tizimidagi rahbarlar bilan uchrashuv vaqtida aytib o‘tdi, deb xabar qiladi “RBK”.
“Din, murakkab iqtisodiy vaziyat, siyosiy usullarni qo‘llagan holda bizga hujum qilishayotganini tushunishimiz lozim. Ular chechenlarni ahmoq deb o‘ylab, ulardan uchinchi marta ham foydalanish mumkin deb hisoblamoqda. Yo‘q, bir marta foydalanishdi, ikkinchi marta ham foydalanishdi. Uchinchi safar bo‘lmaydi”, — dedi Qodirov.
Checheniston yetakchisining fikricha, asosiy e’tiborni yoshlar bilan g‘oyaviy ishlar olib borishga qaratish kerak.
Yanvar oyining oxirida Qodirov jurnalistlar bilan suhbatda respublikada uchinchi urush yuzaga kelishiga yo‘l qo‘ymaslik uchun turmada o‘tirishga tayyorligini bildirgandi.
