Moskvaning Timiryazev tuman sudi 29-oktabr kuni Rossiya Liberal-demokratik partiyasi yetakchisi Vladimir Jirinovskiyning Sobiq Ittifoq sobiq prezidenti Mixail Gorbachyovga nisbatan izzat-nafs va obro‘ himoyasi haqidagi da’vosini ko‘rib chiqishni 13-noyabrga ko‘chirdi. Bu haqda “TASS” xabar bermoqda.
Shu tariqa, tomonlar vakillarining siyosatchilar sud majlisida shaxsan qatnashish istagida bo‘lgani tufayli majlisni keyinga qoldirish haqidagi iltimosnomalari qondirildi.
Avvalroq sud Gorbachyov vakillarining iltimosini qondirib, eshitishni 29-oktabrga qoldirgan, ular Gorbachyov sud majlisida shaxsan o‘zi qatnashmoqchi ekanligini aytgan edi.
Eslatib o‘tamiz, Jirinovskiyning da’vosi Gorbachyovning “Kremldan so‘ng” kitobi chop etilishi bilan bog‘liq. Jirinovskiyning aytishicha, kitobda uning ekstremistik ruhdagi shiorlari va provokatsiyalarga aloqadorligi to‘g‘risida so‘z borgan. Partiya yetakchisining fikriga ko‘ra, bu ma’lumotlar haqiqatga to‘g‘ri kelmaydi.
Da’vo arizasi 7-sentabr kuni Moskvaning Timiryazev tuman sudiga berilgan. Jirinovskiy Gorbachyovdan yetkazilgan ma’naviy zarar uchun 1 million rubl va chop etilgan ma’lumotlarga raddiya berishni talab qilmoqda.
Izoh (0)