Yerga 31-oktabr kuni yaqinlashishi kutilayotgan favqulodda xavfli asteroid oradan uch yil o‘tib yana Yer atrofiga qaytadi. Bu haqda, Rossiya Fanlar akademiyasining Keldish nomidagi Amaliy matematika instituti ilmiy xodimi va Xalqaro ilmiy optik tarmoq (ISON) ishtirokchisi Leonid Yeleninga asoslanib, “TASS” xabar bermoqda.
“TV145 asteroidi kelasi safar Yerga 2018-yil 11-noyabr kuni yaqinlashadi, biroq 31-oktabrdagi yaqinlashuvdan biroz uzoqroq — 40 million kilometr masofadan uchib o‘tadi”, — dedi olim. Uning qayd etishicha, bundan keyingi yaqinlashuvlar hozircha aniqlanmagan. Hozir ma’lum bo‘lgan bir fakt — ushbu asteroid “yaqin 30 yil davomida Yer bilan to‘qnashmaydi”.
TV145 asteroidi Toshkent vaqti bilan 31-oktabr kuni 22:14 da, Yerdan 486 ming kilometr masofada uchib o‘tadi. Uni binokl yoki uncha katta bo‘lmagan havaskor teleskoplari orqali tomosha qilish mumkin bo‘ladi. Qayd etish joiz, binoklda tomosha qilish mumkin asteriodlar ufqda kamida besh yilda bir marta paydo bo‘ladi.
Asteroid hajmi 260—650 metrga teng, deb taxmin qilinmoqda. Hajmi va Yerga yaqin o‘tishidan kelib chiqqan holda, mazkur asteroid Yerga to‘qnashishi mumkin bo‘lganligi jihatidan favqulodda xavfli fazoviy jismlar qatoriga kiritilgan. Ushbu ro‘yxatga diametri 100 metrdan ortiq bo‘lgan va Yerdan 7,5 million kilometr masofada uchib o‘tadigan jismlar kiritiladi.
Izoh (0)