Xitoy 17 milliard dollar evaziga 130 ta Airbus samolyotlarini sotib oladi. Bu haqda “Vedomosti” xabar bermoqda.
Bloomberg xabariga ko‘ra, 30 ta A330 va 100 dona A320 laynerlarini sotib olish bo‘yicha shartnoma Germaniya kansleri Angela Merkel va Xitoy bosh vaziri Li Ketsyan o‘rtasida 29 oktabr, payshanba kuni Pekinda bo‘lib o‘tgan uchrashuv chog‘ida imzolandi.
Bloomberg mazkur kelishuvni keyingi 20 yil ichida jahondagi eng yirik aviabozorga aylanishi kutilayotgan Xitoy uchun Airbus va Boeing o‘rtasidagi raqobat nuqtai nazaridan ko‘rib chiqdi. Boeing prognoziga ko‘ra, keyingi 20 yil davomida Xitoyga umumiy qiymati taxminan 950 milliard dollar bo‘lgan 6330 ta yangi laynerlar kerak bo‘ladi.
Agentlikning qayd etishicha, Xitoy iqtisodiyotining o‘sishi va yo‘lkirasi arzon aviakompaniyalarning paydo bo‘lishi xitoyliklarning aviatashuvchilardan foydalanish imkoniyatlarini oshirmoqda va mahalliy aviakompaniyalar o‘z parklarini kengaytirishga majbur bo‘lmoqda.
So‘nggi vaqtlarda Xitoy hukumati xorijiy samolyot ishlab chiqaruvchi shirkatlarning mamlakatga bo‘lgan qiziqishini rag‘batlantirmoqda. Xususan, Tyanszinda Airbus’ning A320 samolyotlarini yig‘ish bo‘yicha korxonasi bor, yaqin vaqt ichida A330’ni yig‘ish bo‘yicha korxonani qurish borasida kelishuvni imzolash ko‘zda tutilgan.
Iyul oyida Airbus Xitoydan 45 dona yangi A330 samolyotlari uchun buyurtma olgan edi, buyurtma qilingan samoyotlar soni keyinchalik 75 tagacha oshirilishi mumkin. Sentabr oyida esa Boeing xitoylik aviatashuvchilardan 300 samolyot uchun buyurtma olgandi, tez orada Xitoyda Boeing 737 laynerlarini yig‘adigan korxona ish boshlashi kutilmoqda.
Izoh (0)