Qochoqlar va favqulodda vaziyatlardan jabr ko‘rgan shaxslarga eng minimal yordamni ko‘rsatish uchun jahon insonparvarlik tashkilotlariga 20 milliard dollarga yaqin mablag‘ zarur. Bu haqda “Interfaks” xabar bermoqda.
BMTning Kavkaz, Markaziy Osiyo va Ukrainadagi gumanitar masalalarni muvofiqlashtirish bo‘yicha mintaqaviy ofisi boshlig‘i Marsel Vassenning so‘zlariga ko‘ra, hozirgi vaqtda butun dunyo bo‘yicha ko‘chishga majbur bo‘lgan kishilar soni 60 millionni, urush va tabiiy ofatlardan jabr ko‘rayotganlar soni esa 100 millionni tashkil etadi.
“Bu odamlarga o‘z oilasini boqish uchun har kuni pul kerak. 2004-yili eng o‘tkir gumanitar talablarni qondirish uchun 3 milliard dollar kerak edi, shundan beri mazkur ko‘rsatkich 430 foizga oshdi va hozirda 20 milliard dollarga yaqinlashib qolgan. Bu raqam muntazam oshib bormoqda”, — dedi BMT vakili.
Uning qayd etishicha, “talablar” eng o‘tkir ehtiyojlar: oziq-ovqat, sog‘liqni saqlash, “odamlar ochiq osmon ostida emas, hech bo‘lmasa chodirlarda yashashi uchun” vaqtinchalik boshpanani nazarda tutadi. “Insonparvarlik tashkilotlari yakkalikda bunday ko‘lamdagi yordamni ko‘rsatishga qodir emas, shu sababli BMT butun jahon bo‘ylab, xususan, “xususiy sektor”dagi hamkorlar bilan ishlaydi”, — dedi Vassen.
Izoh (0)