Xitoy janubida 11—13 yosh oralig‘idagi uch o‘smir o‘g‘rilik vaqtida o‘qituvchi ayolni o‘ldirib qo‘ydi. Bu haqda The South China Morning Post xabar bermoqda.
Hodisa 18-oktabr kuni Xunan viloyatida yuz bergan. Boshlang‘ich maktab atrofida sayr qilib yurgan o‘quvchilar muassasani faqat bitta o‘qituvchi qo‘riqlayotganini payqab qolgan. Shundan so‘ng ular ayolga hujum qilib, uni tunashga qaror qilgan.
Dastlab ular 52 yoshli o‘qituvchi ayolni yog‘och tayoq bilan savalagan, uning og‘ziga latta tiqib, hojatxonaga qamab qo‘ygan. Ayol shu yerda vafot etgan.
Shundan so‘ng o‘smirlar ayolning mobil telefoni va 2 ming yuan (315 dollar) miqdoridagi naqd pulini olib, hodisa joyidan ketgan. Ertasi kuni ularni politsiya hibsga olgan.
Nashrning xabar berishicha, bu o‘smirlarning ota-onalari Xitoyning yirik shaharlaridagi sanoat korxonalarida mehnat qiladi.
Xitoyda qishloq aholisi odatda pul topish maqsadida katta shaharlarga yo‘l olarkan, farzandlarini qarindoshlari qaramog‘ida qoldiradi. Hozirgi vaqtda bunday o‘smirlar orasidagi jinoyatchilik darajasi Xitoyning jiddiy ijtimoiy muammolaridan biri bo‘lib qolmoqda.
Izoh (0)