Хитой жанубида 11—13 ёш оралиғидаги уч ўсмир ўғрилик вақтида ўқитувчи аёлни ўлдириб қўйди. Бу ҳақда The South China Morning Post хабар бермоқда.
Ҳодиса 18 октябрь куни Хунань вилоятида юз берган. Бошланғич мактаб атрофида сайр қилиб юрган ўқувчилар муассасани фақат битта ўқитувчи қўриқлаётганини пайқаб қолган. Шундан сўнг улар аёлга ҳужум қилиб, уни тунашга қарор қилган.
Дастлаб улар 52 ёшли ўқитувчи аёлни ёғоч таёқ билан савалаган, унинг оғзига латта тиқиб, ҳожатхонага қамаб қўйган. Аёл шу ерда вафот этган.
Шундан сўнг ўсмирлар аёлнинг мобил телефони ва 2 минг юань (315 доллар) миқдоридаги нақд пулини олиб, ҳодиса жойидан кетган. Эртаси куни уларни полиция ҳибсга олган.
Нашрнинг хабар беришича, бу ўсмирларнинг ота-оналари Хитойнинг йирик шаҳарларидаги саноат корхоналарида меҳнат қилади.
Хитойда қишлоқ аҳолиси одатда пул топиш мақсадида катта шаҳарларга йўл оларкан, фарзандларини қариндошлари қарамоғида қолдиради. Ҳозирги вақтда бундай ўсмирлар орасидаги жиноятчилик даражаси Хитойнинг жиддий ижтимоий муаммоларидан бири бўлиб қолмоқда.
Изоҳ (0)