Amir Temur maqbarasiga tegishli haqiqiy koshin 100 yildan ortiq vaqt mobaynida Rossiyaning Sverdlov viloyatidagi o‘lkashunoslik muzeyi omborida qarovsiz holda yotdi. “TASS” xabariga ko‘ra, XV asrga oid marmar eksponatni 2015-yilda muzey xodimlari tasodifan topib oldi.
“1887-yilgi Ural-Sibir ko‘rgazmasi katalogida biz Amir Temur maqbarasiga mansub eksponat haqidagi yozuvni topdik. O‘shanda bu koshinni Turkistondagi mustamlakachilik yurishlari ishtirokchisi Aleksandr Baranov namoyish etgan. Katta ehtimol bilan, eksponatni uning o‘zi Samarqanddan olib kelgan. Biz haqiqiy fragmentni qidirishni boshlab, yarim millionga yaqin boshqa artefaktlar orasidan tezgina topdik”, — dedi muzey ilmiy xodimi.
Amir Temur maqbarasidan olingan koshinning uzunligi bir metrdan ortiq, kengligi esa taxminan 15 santimetr. Marmar koshinning bir qismida asliga to‘g‘ri surat saqlanib qolgan.
Ma’lumot uchun, Temuriylar saltanati va sulolasiga asos solgan sohibqiron Amir Temur 1405-yili vafot etgan va Samarqanddagi oilaviy xilxona — Go‘ri-Amir maqbarasiga dafn etilgan. Keyinchalik bu yerga uning o‘g‘illari va nevaralari ham ko‘milgan.
Izoh (0)