Нью-Йоркдаги Turing Pharmaceuticals фармацевтика компанияси август ойида АҚШда оммалашган бир қатор дори воситаларини ишлаб чиқариш ҳуқуқини сотиб олганди. Meduza хабарига кўра, улар орасида паразитар инфекцияни даволашда ишлатиладиган дараприм дориси ҳам бор эди.
Дараприм 1950 йиллардан бери токсоплазмоз касаллигини даволашда ишлатиладиган препарат бўлиб, Жаҳон соғлиқни сақлаш ташкилотининг асосий дори воситалари рўйхатига киритилган. Баъзи маълумотларга кўра, сайёра аҳолисининг 50 фоизи токсоплазмоз билан зарарланган, у иммун тизими касалланган одамлар учун айниқса хавфли. Шу сабабли ҳам АҚШда дараприм ОИВ билан касалланганларга тавсия этиладиган стандарт препаратлардан бири эди.
Turing Pharmaceuticals дарапримни сотиб олганидан сўнг, дорихоналарда унинг бир таблеткаси нархи 18 доллардан 750 долларгача кўтарилиб кетди (нарх ўсиши 4166 фоизга тенг бўлди; дастлаб ОАВ дорининг эски — 13,5 долларлик нархидан келиб чиқиб, бир таблетка 5500 фоизга қимматлашгани ҳақида ёзганди, бироқ Turing Pharmaceuticals раҳбари Мартин Шкрелининг вакиллари ОАВнинг ҳисоб-китобдаги хатосини кўрсатиб берди).
ОИТС билан касалланганларнинг манфаатларини ҳимоя қилувчи жамоат ташкилоти — HIV Medicine Association ассоциацияси ҳисоб-китобларига кўра, тиббий суғурта бўлган тақдирда ҳам бир дона дараприм таблеткаси ҳозирги нарх-навода бемор учун камида 150 долларга тушади. Бироқ, The Washington Post’нинг ёзишича, мазкур препарат билан даволаниш харажатлари тиббий суғурта билан қопланмайди.
Нархнинг кескин ўсиши ижтимоий тармоқларда фаол норозиликка ва баҳс-мунозараларга сабаб бўлди. Хусусан, Reddit фойдаланувчилари Turing Pharmaceuticals’нинг барча маҳсулотларини бойкот қилишни таклиф қилишди. Бироқ баъзи фойдаланувчилар бундай ёндашув самарасиз эканлигини ҳам айтиб ўтди: ичмасанг, ўладиган дорингни бойкот қилиш бироз мураккаб жараён.
Бироз вақт ўтиб Мартин Шкрелига АҚШ сиёсий машинаси ҳам ташланди. Сенат Turing Pharmaceuticals’ни аввалроқ бошланган можаро — дори воситалари бозоридаги нархларнинг ўсиши бўйича терговга жалб этди, АҚШ президентлигига номзод Ҳиллари Клинтон эса бундай ҳаракатларга нисбатан қарши кураш бўйича ўз режасини зудлик билан тақдим этишини билдирди.
Price gouging like this in the specialty drug market is outrageous. Tomorrow I'll lay out a plan to take it on. -H https://t.co/9Z0Aw7aI6h
— Hillary Clinton (@HillaryClinton) September 21, 2015
«Мартин Шкрелини на жамоатчиликнинг ғазаб ва шикоятларга тўла мактублари, на журналистларнинг даъволари, на сиёсатчиларнинг таҳдидлари ташвишга солмоқда. Turing Pharmaceuticals вакилларининг изоҳлашича, улар нархи қимматлаган дори воситаларидан тушган даромадни токсоплазмозни чуқур ўрганишга, шунингдек, аҳолини мазкур касаллик хавфларидан огоҳлантиришга йўналтирмоқчи», — деб ёзади Meduza.
Изоҳ (0)