O‘zbek futboli yulduzlaridan biri, o‘smirlar o‘rtasida Jahon va Yevropa chempioni, Osiyo o‘yinlari g‘olibi Mirjalol Qosimov bugun, 17-sentabr kuni 45 yoshga to‘ldi, deb xabar beradi O‘zbekiston Milliy olimpiya qo‘mitasi matbuot xizmati.
1986-yilda futbolchilik faoliyatini boshlagan Mirjalol Qosimov 2005-yilga qadar SK FShM (Moskva, Rossiya), “Paxtakor” (Toshkent, O‘zbekiston), “Dinamo” (Minsk, Belarus), “Alaniya” (Vladikavkaz, Rossiya), “Krilya Sovetov” (Samara, Rossiya), “Al-Shabab” (BAA) va “Mash’al” (Muborak, O‘zbekiston) jamoalarida to‘p surib, to‘rt yuzdan ortiq uchrashuvda maydonga tushgan va yuzdan ziyod golga mualliflik qilgan.
Mirjalol Qosimov 1998, 2002 va 2003-yillari O‘zbekiston chempionatining oltin medaliga, 1993 va 2005-yillarda kumush medalga sazovor bo‘lgan. To‘rt bor (1993, 1997, 2002, 2003) mamlakat kubogini qo‘lga kiritgan. 1998-yilgi O‘zbekiston chempionatida eng yaxshi to‘purar sovriniga ega bo‘lgan.
O‘zbekiston terma jamoasida uzoq yillar davomida sardorlik qilgan Mirjalol Qosimov xalqaro maydonlarda erishilgan ko‘plab g‘alabalarda o‘zining munosib hissasini qo‘shgan.
Murabbiylik faoliyatini Muborakning “Mash’al” jamoasida boshlagan Mirjalol Qosimov, 2006-yilning 30-dekabr kuni O‘zbekiston milliy va olimpiya terma jamoasi bosh murabbiyi Rauf Inileyevga yordamchi murabbiylik vazifasiga tayinlangan. 2007-yili Toshkentning “Quruvchi” (hozirgi “Bunyodkor”) jamoasiga bosh murabbiy etib tayinlandi. 2008—2010-yillari hamda 2012—2015-yillari O‘zbekiston terma jamoasi bosh murabbiyi sifatida faoliyat ko‘rsatdi.
2012-yilgi mavsum yakunlariga ko‘ra, O‘zbekiston futbol federatsiyasi tomonidan “yilning eng yaxshi murabbiyi” deb e’lon qilindi.
Murabbiy sifatida uch bor (2010, 2011, 2013-yy) O‘zbekiston chempionatining oltin medaliga sazovor bo‘lgan va uch marotaba (2010, 2012, 2013-yy) mamlakat kubogini qo‘lga kiritgan. Ikki bor “Bunyodkor” jamoasini Osiyo Chempionlar Ligasining yarim finaliga qadar olib chiqqan.
O‘zbekistonda xizmat ko‘rsatgan murabbiy, “O‘zbekiston iftixori” unvoni sohibi Mirjalol Qosimovning o‘zbek futbolining rivojiga qo‘shgan hissasi munosib qadrlanib, 2004-yili “Fidokorona xizmatlari uchun” hamda 2007-yili “Mehnat shuhrati” ordenlari bilan mukofotlangan.
Izoh (0)