Ўзбек футболи юлдузларидан бири, ўсмирлар ўртасида Жаҳон ва Европа чемпиони, Осиё ўйинлари ғолиби Миржалол Қосимов бугун, 17 сентябрь куни 45 ёшга тўлди, деб хабар беради Ўзбекистон Миллий олимпия қўмитаси матбуот хизмати.
1986 йилда футболчилик фаолиятини бошлаган Миржалол Қосимов 2005 йилга қадар СК ФШМ (Москва, Россия), «Пахтакор» (Тошкент, Ўзбекистон), «Динамо» (Минск, Беларусь), «Алания» (Владикавказ, Россия), «Крилья Советов» (Самара, Россия), «Ал-Шабаб» (БАА) ва «Машъал» (Муборак, Ўзбекистон) жамоаларида тўп суриб, тўрт юздан ортиқ учрашувда майдонга тушган ва юздан зиёд голга муаллифлик қилган.
Миржалол Қосимов 1998, 2002 ва 2003 йиллари Ўзбекистон чемпионатининг олтин медалига, 1993 ва 2005 йилларда кумуш медалга сазовор бўлган. Тўрт бор (1993, 1997, 2002, 2003) мамлакат кубогини қўлга киритган. 1998 йилги Ўзбекистон чемпионатида энг яхши тўпурар совринига эга бўлган.
Ўзбекистон терма жамоасида узоқ йиллар давомида сардорлик қилган Миржалол Қосимов халқаро майдонларда эришилган кўплаб ғалабаларда ўзининг муносиб ҳиссасини қўшган.
Мураббийлик фаолиятини Муборакнинг «Машъал» жамоасида бошлаган Миржалол Қосимов, 2006 йилнинг 30 декабрь куни Ўзбекистон миллий ва олимпия терма жамоаси бош мураббийи Рауф Инилеевга ёрдамчи мураббийлик вазифасига тайинланган. 2007 йили Тошкентнинг «Қурувчи» (ҳозирги «Бунёдкор») жамоасига бош мураббий этиб тайинланди. 2008—2010 йиллари ҳамда 2012—2015 йиллари Ўзбекистон терма жамоаси бош мураббийи сифатида фаолият кўрсатди.
2012 йилги мавсум якунларига кўра, Ўзбекистон футбол федерацияси томонидан «йилнинг энг яхши мураббийи» деб эълон қилинди.
Мураббий сифатида уч бор (2010, 2011, 2013 йй) Ўзбекистон чемпионатининг олтин медалига сазовор бўлган ва уч маротаба (2010, 2012, 2013 йй) мамлакат кубогини қўлга киритган. Икки бор «Бунёдкор» жамоасини Осиё Чемпионлар Лигасининг ярим финалига қадар олиб чиққан.
Ўзбекистонда хизмат кўрсатган мураббий, «Ўзбекистон ифтихори» унвони соҳиби Миржалол Қосимовнинг ўзбек футболининг ривожига қўшган ҳиссаси муносиб қадрланиб, 2004 йили «Фидокорона хизматлари учун» ҳамда 2007 йили «Меҳнат шуҳрати» орденлари билан мукофотланган.
Изоҳ (0)