Rahmon: Tojikistonda terrorchilarni yo‘q qilish bo‘yicha operatsiya yaqin kunlarda yakunlanadi

Tojikiston kuch tuzilmalarining aksilhukumat qurolli guruhini topish va zararsizlantirishga qaratilgan operatsiyasi yaqin kunlarda yakunlanadi, deya xabar bermoqda “TASS”. Bu haqda Tojikiston prezidenti Emomali Rahmon 6-sentabr kuni Vahdat shahri aholisi qarshisida nutq so‘zlar ekan, aytib o‘tdi. Davlat rahbari bu yerda ishchi tashrifi bilan bo‘lib turibdi.

Tojikiston yetakchisi yoshlarning bir qismi IShID kabi terrorchilik guruhlariga jalb etilgani yuzasidan xavotir bildirdi, u ushbu guruhda respublikaning 500 dan ziyod fuqarosi borligini ma’lum qildi.

Vahdat shahar IIB va Tojikiston mudofaa vazirligi apparatiga uyushtirilgan terrorchilik hujumlari bilan bog‘liq vaziyatni tilga olar ekan, davlat rahbari “yaqin bir necha kun ichida ozodlikda bo‘lgan terrorchilar qo‘lga olinib, operatsiya yakunlanishi”ni ta’kidladi.

Tojikistonda hukumat kuch tuzilmalarining mamlakat mudofaa vaziri sobiq o‘rinbosari Abduhalim Nazarzoda tarafdorlariga qarshi maxsus operatsiyalari o‘tkazilmoqda. Guruhning 13 a’zosi yo‘q qilindi, yana 35 kishi qo‘lga olindi.

Tojikiston IIV matbuot xizmati rahbari Jaloliddin Sadriddinovning so‘zlariga ko‘ra, o‘tgan kunlar davomida Tojikiston mudofaa vazirining sobiq o‘rinbosari Abduhalim Nazarzoda boshliq terrorchilik guruhi tomonidan Vahdat shahridagi IIB binosi va Tojikiston Mudofaa vazirligi markaziy apparatiga uyushtirilgan ikki hujum natijasida 8 nafar militsiya xodimi halok bo‘lgan.