Тожикистон куч тузилмаларининг аксилҳукумат қуролли гуруҳини топиш ва зарарсизлантиришга қаратилган операцияси яқин кунларда якунланади, дея хабар бермоқда «TAСС». Бу ҳақда Тожикистон президенти Эмомали Раҳмон 6 сентябрь куни Ваҳдат шаҳри аҳолиси қаршисида нутқ сўзлар экан, айтиб ўтди. Давлат раҳбари бу ерда ишчи ташрифи билан бўлиб турибди.
Тожикистон етакчиси ёшларнинг бир қисми ИШИД каби террорчилик гуруҳларига жалб этилгани юзасидан хавотир билдирди, у ушбу гуруҳда республиканинг 500 дан зиёд фуқароси борлигини маълум қилди.
Ваҳдат шаҳар ИИБ ва Тожикистон мудофаа вазирлиги аппаратига уюштирилган террорчилик ҳужумлари билан боғлиқ вазиятни тилга олар экан, давлат раҳбари «яқин бир неча кун ичида озодликда бўлган террорчилар қўлга олиниб, операция якунланиши»ни таъкидлади.
Тожикистонда ҳукумат куч тузилмаларининг мамлакат мудофаа вазири собиқ ўринбосари Абдуҳалим Назарзода тарафдорларига қарши махсус операциялари ўтказилмоқда. Гуруҳнинг 13 аъзоси йўқ қилинди, яна 35 киши қўлга олинди.
Тожикистон ИИВ матбуот хизмати раҳбари Жалолиддин Садриддиновнинг сўзларига кўра, ўтган кунлар давомида Тожикистон мудофаа вазирининг собиқ ўринбосари Абдуҳалим Назарзода бошлиқ террорчилик гуруҳи томонидан Ваҳдат шаҳридаги ИИБ биноси ва Тожикистон Мудофаа вазирлиги марказий аппаратига уюштирилган икки ҳужум натижасида 8 нафар милиция ходими ҳалок бўлган.
Изоҳ (0)