Jinoyat ishlari bo‘yicha Qohira sudi 27-iyul, dushanba kuni misrlik sudyalarni haqorat qilish ishi bo‘yicha navbatdagi majlisni o‘tkazdi. “TASS” xabariga ko‘ra, mazkur ish bo‘yicha ayblanayotganlarning biri, Misr sobiq prezidenti Muhammad Mursiy mazkur mahkamani tan olmasligini ma’lum qildi.
Sudya sudlanuvchilar uchun mo‘ljallangan joydagi mikrofonni o‘chirgunicha, Mursiy: “Men, adliyani hurmat qilsam-da, mazkur sudni tan olmasligimni ma’lum qilmoqchiman. Shuningdek, men inqilobchiman va davlat to‘ntarishini rad etishim haqida bayonot beraman”, — deyishga ulgurib qoldi.
Sudyalarni haqorat qilish ishi bo‘yicha Mursiydan tashqari “Musulmon birodarlar” tashkilotining yana 24 nafar vakili, siyosiy arboblar, jurnalistlar, advokatlar, 2011-yilgi inqilob faollari sud qilinmoqda.
Mazkur sud ishi 2015-yilning may oyida boshlangan edi. Prokuratura ma’lumotlariga ko‘ra, sudlanuvchilar mamlakat sud korpusi vakillarini bir necha parlament minbari, televizion chiqishlar va ijtimoiy tarmoqlar vositasida haqorat qilgan.
Jumladan, Muhammad Mursiy omma oldida sudyalarni firibgarlikda ayblaganlikda ayblanmoqda.
Izoh (0)