Жиноят ишлари бўйича Қоҳира суди 27 июль, душанба куни мисрлик судьяларни ҳақорат қилиш иши бўйича навбатдаги мажлисни ўтказди. «ТАСС» хабарига кўра, мазкур иш бўйича айбланаётганларнинг бири, Миср собиқ президенти Муҳаммад Мурсий мазкур маҳкамани тан олмаслигини маълум қилди.
Судья судланувчилар учун мўлжалланган жойдаги микрофонни ўчиргунича, Мурсий: «Мен, адлияни ҳурмат қилсам-да, мазкур судни тан олмаслигимни маълум қилмоқчиман. Шунингдек, мен инқилобчиман ва давлат тўнтаришини рад этишим ҳақида баёнот бераман», — дейишга улгуриб қолди.
Судьяларни ҳақорат қилиш иши бўйича Мурсийдан ташқари «Мусулмон биродарлар» ташкилотининг яна 24 нафар вакили, сиёсий арбоблар, журналистлар, адвокатлар, 2011 йилги инқилоб фаоллари суд қилинмоқда.
Мазкур суд иши 2015 йилнинг май ойида бошланган эди. Прокуратура маълумотларига кўра, судланувчилар мамлакат суд корпуси вакилларини бир неча парламент минбари, телевизион чиқишлар ва ижтимоий тармоқлар воситасида ҳақорат қилган.
Жумладан, Муҳаммад Мурсий омма олдида судьяларни фирибгарликда айблаганликда айбланмоқда.
Изоҳ (0)