Efiopiya bosh vaziri: Afrikada xavfsizlikni ta’minlash uchun AQSh ko‘magi zarur

Afrika mamlakatlari xavfsizlikni ta’minlash sohasida hozircha AQShning ko‘magiga muhtoj. Bu haqda Efiopiya bosh vaziri Xaylemariam Desalen ma’lum qildi, deya xabar bermoqda “RIA Novosti”.

“Afrika xavfsizlik masalalarini hal qilishni o‘z qo‘liga olishi kerak, deb hisoblaymiz. Biroq biz AQShning ko‘magiga muhtojmiz”, — dedi bosh vazir AQSh prezidenti Barak Obama bilan Addis-Abebada bo‘lib o‘tgan qo‘shma matbuot anjumanida.

O‘z navbatida, Obama AQSh va boshqa mamlakatlar 26-iyul, yakshanba kuni Somali poytaxtida navbatdagi teraktni uyushtirgan “Ash-Shabob” terrorchi guruhiga nisbatan bosim o‘tkazishda davom etishiga va’da berdi. Efiopiya harbiy xizmatchilari Afrika ittifoqi kuchlari (AMISOM) tarkibida “Ash-Shabob”ga qarshi kurash olib bormoqda.

Barak Obama to‘rt kunlik tashrif bilan Afrikada bo‘lib turibdi. O‘zining Afrika sayohati davomida Amerika yetakchisi Keniya va Efiopiyada bo‘ldi.