Isroil parlamenti a’zolari mamlakat Jinoyat kodeksining avtomobillarga va politsiyachilarga qarata tosh uloqtirish to‘g‘risidagi moddalariga tuzatish kiritdi. “RIA Novosti” xabariga ko‘ra, mazkur qilmish uchun endi ayblanuvchi 20 yilgacha ozodlikdan mahrum etilishi mumkin.
Mazkur tuzatishlardan ko‘zlangan asosiy maqsad — aksariyat holatlarda Iordan daryosining G‘arbiy sohilidagi falastinliklar va Sharqiy Quddus arablari tomonidan qo‘llaniladigan tosh otish amaliyotiga barham berishdan iborat. Ushbu qonunchilik tashabbusini Knessetdagi 120 deputatdan 69 nafari qo‘llab-quvvatladi, 17 nafari esa bunga qarshi chiqdi.
Yangi qonunga muvofiq, harakatlanayotgan mashinaga qarata tosh otish, bu tosh haydovchi yoki salondagi yo‘lovchilarga qasddan zarar yetkazish maqsadida otilgani isbotlansa — 20 yilgacha, agar isbotlanmasa — 10 yilgacha ozodlikdan mahrum etish bilan jazolanadi. Politsiyachilar yoki patrul mashinalariga qarata “ularning xizmat majburiyatlarini bajarishga xalal berish maqsadida” tosh otganlar esa besh yilgacha ozodlikdan mahrum etiladi.
Qonunning kirish qismida qayd etilishicha, Isroil sudlari har yili tosh otuvchilarga nisbatan mingga yaqin ayblovchi hukmlarni chiqaradi. Reuters agentligi ma’lumotlariga ko‘ra, G‘arbiy sohilda mashinalari toshbo‘ron qilinishi natijasida 2011-yildan beri uch nafar isroillik halok bo‘lgan.
Izoh (0)