Исроил парламенти аъзолари мамлакат Жиноят кодексининг автомобилларга ва полициячиларга қарата тош улоқтириш тўғрисидаги моддаларига тузатиш киритди. «РИА Новости» хабарига кўра, мазкур қилмиш учун энди айбланувчи 20 йилгача озодликдан маҳрум этилиши мумкин.
Мазкур тузатишлардан кўзланган асосий мақсад — аксарият ҳолатларда Иордан дарёсининг Ғарбий соҳилидаги фаластинликлар ва Шарқий Қуддус араблари томонидан қўлланиладиган тош отиш амалиётига барҳам беришдан иборат. Ушбу қонунчилик ташаббусини Кнессетдаги 120 депутатдан 69 нафари қўллаб-қувватлади, 17 нафари эса бунга қарши чиқди.
Янги қонунга мувофиқ, ҳаракатланаётган машинага қарата тош отиш, бу тош ҳайдовчи ёки салондаги йўловчиларга қасддан зарар етказиш мақсадида отилгани исботланса — 20 йилгача, агар исботланмаса — 10 йилгача озодликдан маҳрум этиш билан жазоланади. Полициячилар ёки патруль машиналарига қарата «уларнинг хизмат мажбуриятларини бажаришга халал бериш мақсадида» тош отганлар эса беш йилгача озодликдан маҳрум этилади.
Қонуннинг кириш қисмида қайд этилишича, Исроил судлари ҳар йили тош отувчиларга нисбатан мингга яқин айбловчи ҳукмларни чиқаради. Reuters агентлиги маълумотларига кўра, Ғарбий соҳилда машиналари тошбўрон қилиниши натижасида 2011 йилдан бери уч нафар исроиллик ҳалок бўлган.
Изоҳ (0)