Qozog‘iston poytaxtidagi talabalar poraxo‘rlik holatlari haqida WhatsApp orqali xabar berishi mumkin bo‘ladi

Qozog‘iston poytaxti — Ostona shahridagi oliy ta’lim muassasalari talabalari, ularning ota-onalari va o‘qituvchilar yangi o‘quv yilidan boshlab korrupsiyaviy huquqbuzarliklar haqida WhatsApp orqali xabar berishlari mumkin bo‘ladi. Kazakhstan Today xabariga ko‘ra, yagona WhatsApp raqami Ostona shahar Yoshlar siyosati masalalari boshqarmasi tomonidan ro‘yxatdan o‘tkazilgan.

Ostona Yoshlar siyosati masalalari boshqarmasining Yoshlar siyosatini qo‘llab-quvvatlash davlat jamg‘armasi direktori Baxitjan Junisbekovning so‘zlariga ko‘ra, korrupsiyaviy qonunchilikni buzgan talaba va o‘qituvchilarni omma oldida jazolash kerak. Uning fikricha, korrupsiya fakti aniqlanganidan so‘ng, o‘qituvchini ishdan haydash, talabani esa o‘qishdan chetlatish kerak.

“Bu katta shov-shuvga sabab bo‘ladi, odamlar bularning barini jonli, aniq misolda ko‘radi, pora berish va pora olish qanday oqibatlarga olib kelishiga guvoh bo‘lganidan so‘ng, odamlar bu yo‘ldan qaytadi”, — deb hisoblaydi Junisbekov.

Jamg‘arma direktorining qo‘shimcha qilishicha, oliy ta’lim muassasalarida “pora berishni uyushtirish” uslubini joriy etish kerak. Bu holatda soxta talaba rolini o‘ynaydigan ichki ishlar organi xodimi yoki sirtqi bo‘lim talabasi pedagogga pora berishga urinib ko‘radi. “O‘qituvchi pora olgani tasdiqlanganidan so‘ng, u ishdan haydalishi kerak”, — deya qo‘shimcha qildi Junisbekov.