Bombeydagi 1993-yilgi teraktlar tashkilotchisi 30-iyul kuni qatl etiladi

Hindistonning Bombey shahrida 1993-yili amalga oshirilgan va 250 dan ortiq odamning hayotiga zomin bo‘lgan teraktlar ketma-ketligi tashkilotchilaridan biri — Yoqub Memonga nisbatan o‘lim jazosi 30-iyul kuni ijro etiladi. Bu haqda “RIA Novosti” xabar bermoqda.

NDTV telekanali ma’lumotlariga ko‘ra, o‘lim jazosi amalga oshiriladigan joy va vaqt Maharashtra shtati bosh vaziri Devendra Fadnavis tomonidan tasdiqlangan, sudlanuvchining oila a’zolariga bu haqda xabar berilgan.

“Yoqub Nagpur qamoqxonasida yoki Punadagi Yervada qamoqxonasida osib o‘ldirilishi mumkin”, — dedi Nagpur qamoqxonasi superintendanti Yogesh Desai.

Memonga nisbatan o‘lim hukmi 2007-yili chiqarilgan, 2013-yili esa mazkur hukmni Hindiston Oliy sudi tasdiqlagan edi. Memon teraktlarning bevosita ijrochisi bo‘lmasa-da, u jinoiy til biriktirishda aybdor deb topildi.

Mazkur jinoyat ishi bo‘yicha asosiy ayblanuvchi Yoqubning akasi, Tigr Memon nomi bilan ham tanilgan kriminal arbob — Ibrohim Memon hisoblanadi. U 1993-yili Hindistonni tark etgan va shundan beri uning qayerda ekanligi noma’lum.

1993-yilning 12-mart kuni Bombeyning turli hududlarida 12 portlash yuz bergan, oqibatda 257 nafardan 300 nafargacha odam halok bo‘lgan, 700 ga yaqin kishi turli darajada tan jarohati olgan.