Interpol bazasidagi Viktor Yanukovichning qidirilayotgani haqidagi axborot Ukraina sobiq prezidenti advokatlari tomonidan uning qidiruvga berilgani ustidan yo‘llagan shikoyatlari sabab vaqtincha o‘chirib qo‘yilgan. Bu haqda, “RBC.ru” xabariga ko‘ra, Interpolning Ukrainadagi byurosi vakillari ma’lum qilgan.
Byurodagilarning qayd etishicha, Yanukovich hibsga olinishi va Ukrainaga ekstraditsiya qilinishi uchun xalqaro qidiruvga berilgan edi, Ukrainada sobiq prezidentni “juda katta miqdordagi mulkni o‘zlashtirish va talon-toroj qilish yoki xizmat mansabini suiiste’mol qilish yo‘li bilan mazkur mulkni qo‘lga kiritish” ayblovi bo‘yicha jinoiy javobgarlikka tortish ko‘zda tutilgan.
Avvalroq Interpol bazasidan Ukraina sobiq prezidenti uchun ochilgan ma’lumotnoma yo‘qolib qolgani ma’lum bo‘lgandi. Yanukovich bilan ishlayotgan Joseph Hage Aaronson advokatlar idorasi mazkur holatni huquqshunoslarning murojaati bilan izohladi — himoya tomonining fikricha, Ukrainaning sobiq yetakchisi siyosiy sabablarga ko‘ra ta’qib qilinmoqda. Advokatlarning so‘zlariga ko‘ra, aynan shu munosabat bilan Yanukovichga nisbatan Interpol “qizil kartochkasi” o‘z kuchini yo‘qotgan.
Yanukovichning kartochkasi Interpol ma’lumotlar bazasiga 2015-yil 12-yanvar kuni kiritilgan edi. Ma’lumot uchun, Viktor Yanukovich Ukrainani 2014-yil fevralida tark etgan. “RBC.ru”ning Yanukovichga yaqin manbalari ma’lumotiga ko‘ra, Ukraina sobiq prezidenti ayni vaqtda Rossiyaning Rostov viloyatida istiqomat qilmoqda.
Izoh (0)