Интерпол базасидаги Виктор Януковичнинг қидирилаётгани ҳақидаги ахборот Украина собиқ президенти адвокатлари томонидан унинг қидирувга берилгани устидан йўллаган шикоятлари сабаб вақтинча ўчириб қўйилган. Бу ҳақда, «RBC.ru» хабарига кўра, Интерполнинг Украинадаги бюроси вакиллари маълум қилган.
Бюродагиларнинг қайд этишича, Янукович ҳибсга олиниши ва Украинага экстрадиция қилиниши учун халқаро қидирувга берилган эди, Украинада собиқ президентни «жуда катта миқдордаги мулкни ўзлаштириш ва талон-торож қилиш ёки хизмат мансабини суиистеъмол қилиш йўли билан мазкур мулкни қўлга киритиш» айблови бўйича жиноий жавобгарликка тортиш кўзда тутилган.
Аввалроқ Интерпол базасидан Украина собиқ президенти учун очилган маълумотнома йўқолиб қолгани маълум бўлганди. Янукович билан ишлаётган Joseph Hage Aaronson адвокатлар идораси мазкур ҳолатни ҳуқуқшуносларнинг мурожаати билан изоҳлади — ҳимоя томонининг фикрича, Украинанинг собиқ етакчиси сиёсий сабабларга кўра таъқиб қилинмоқда. Адвокатларнинг сўзларига кўра, айнан шу муносабат билан Януковичга нисбатан Интерпол «қизил карточкаси» ўз кучини йўқотган.
Януковичнинг карточкаси Интерпол маълумотлар базасига 2015 йил 12 январь куни киритилган эди. Маълумот учун, Виктор Янукович Украинани 2014 йил февралида тарк этган. «RBC.ru»нинг Януковичга яқин манбалари маълумотига кўра, Украина собиқ президенти айни вақтда Россиянинг Ростов вилоятида истиқомат қилмоқда.
Изоҳ (0)