Kiprning Limasol shahrida istiqomat qiluvchi pensioner 505 yevrodan iborat oylik nafaqasini Gretsiya bosh vaziri Aleksis Siprasga ushbu mamlakatning milliy fondiga qo‘shgan hissasi sifatida jo‘natdi. Bu haqda Cyprus Mail nomli mahalliy gazetaga tayanib, “TASS” xabar bermoqda.
Nashrning yozishicha, 88 yoshga kirgan Onufris Mixailidis kun davomida olish mumkin bo‘lgan 60 yevroni qo‘lga kiritish uchun bankomatlar oldida soatlab navbat kutayotgan greklarning fotosuratlarni ko‘rib, ularga qo‘lidan kelgancha yordam berishga ahd qilgan. Gretsiya bosh vaziriga uni qo‘llab-quvvatlovchi xat yozib, ichiga 505 yevrolik chek solib qo‘ygan.
“Uch qizim ham Gretsiyada bepul ta’lim olgan. Men jo‘natgan pullar arzimagan mablag‘ ekanini tushunaman, biroq greklar uni qayerda ishlatishni lozim topsalar, shunga sarflashi mumkin. Bu xatti-harakatim Gretsiya va uning xalqi oldida mendan kam qarzdor bo‘lmagan boshqa ko‘plab kiprliklar uchun ham o‘rnak bo‘ladi, degan umiddaman”, — deya ta’kidlagan Mixailidis.
Izoh (0)