Кипрнинг Лимасол шаҳрида истиқомат қилувчи пенсионер 505 евродан иборат ойлик нафақасини Греция бош вазири Алексис Ципрасга ушбу мамлакатнинг миллий фондига қўшган ҳиссаси сифатида жўнатди. Бу ҳақда Cyprus Mail номли маҳаллий газетага таяниб, «ТАСС» хабар бермоқда.
Нашрнинг ёзишича, 88 ёшга кирган Онуфрис Михаилидис кун давомида олиш мумкин бўлган 60 еврони қўлга киритиш учун банкоматлар олдида соатлаб навбат кутаётган грекларнинг фотосуратларни кўриб, уларга қўлидан келганча ёрдам беришга аҳд қилган. Греция бош вазирига уни қўллаб-қувватловчи хат ёзиб, ичига 505 евролик чек солиб қўйган.
«Уч қизим ҳам Грецияда бепул таълим олган. Мен жўнатган пуллар арзимаган маблағ эканини тушунаман, бироқ греклар уни қаерда ишлатишни лозим топсалар, шунга сарфлаши мумкин. Бу хатти-ҳаракатим Греция ва унинг халқи олдида мендан кам қарздор бўлмаган бошқа кўплаб кипрликлар учун ҳам ўрнак бўлади, деган умиддаман», — дея таъкидлаган Михаилидис.
Изоҳ (0)