2015-yilning 26—28-iyun kunlari Avstraliyaning Melburn shahrida o‘tkazilgan mamlakat ochiq chempionatida bittadan oltin va kumush medalga sazovor bo‘lgan O‘zbekiston terma jamoasi a’zolari Toshkentga qaytib keldi. Bu haqda O‘zbekiston milliy olimpiya qo‘mitasi matbuot xizmati xabar beradi.
Yashil qit’ada an’anaviy tarzda o‘tkaziladigan mazkur nufuzli musobaqaning bu yilgi bahslarida dunyoning qirqdan ziyod davlati vakillari ishtirok etib, unda O‘zbekiston sharafini himoya qilgan uch nafar sportchidan ikki nafari sovrindorlar safidan o‘rin egalladi.
Shu yil Rossiyada bo‘lib o‘tgan jahon chempionatida oltin medalga sazovor bo‘lgan Dmitriy Shokin (+87 kg) Avstraliyada ham shohsupaning eng yuqori pog‘onasiga ko‘tarilib, o‘z vaznida dunyoda tengsiz ekanligini yana bir karra isbotlagan bo‘lsa, Jahon chempionati kumush medal sovrindori, Osiyo o‘yinlari g‘olibi Jasur Boyqo‘ziyev finalga qadar kechgan bahslarni g‘alaba bilan yakunlab, kumush medal sovrindori bo‘ldi.
Mazkur xalqaro musobaqada Dmitriy Shokin va Jasur Boyqo‘ziyevdan tashqari 2014-yili Nankin (Xitoy)da bo‘lib o‘tgan o‘smirlar olimpiada o‘yinlari sovrindori Umida Abdullayeva ham ishtirok etdi. Afsuski, Umida sovrindorlar safidan joy olmadi.
Toshkent xalqaro aeroportida g‘olib sportchilar Respublika sport jamoatchiligi, OAV xodimlari hamda sportchilarning oila a’zolari tomonidan munosib kutib olindi.
Avstraliya ochiq chempionatida 2016-yili Rio-de-Janeyro shahrida o‘tkaziladigan XXXI yozgi Olimpiada o‘yinlarining yo‘llanmalari uchun reyting ochkolar ham o‘ynaldi. Har bir vazn toifasida g‘oliblikka erishgan sportchilar 20 reyting ochkosiga ega bo‘ldi.
Izoh (0)